Паэурлифтингийн аварга Э.Содномпилжээг “Нийслэл хотын хүндэт иргэн”-д өргөмжиллөө
17 Dec 2019
  • Паэурлифтингийн аварга Э.Содномпилжээг “Нийслэл хотын хүндэт иргэн”-д өргөмжиллөө

Монгол Улсын биеийн тамир спортын салбарт олон жил үр бүтээлтэй ажиллаж, пара пауэрлифтингийн спортоор өндөр амжилт гаргасан Пауэрлифтингийн дэлхийн аварга, Улсын таван удаагийн аварга, Гавьяат тамирчин Э.Сондомпилжээг “Нийслэл хотын хүндэт иргэн”-д өргөмжилж, тэмдгийг өнөөдөр гардууллаа. Түүний хувьд 2019 оны долдугаар сард болсон пара пауэрлифтингийн Дэлхийн аварга шалгаруулах тэмцээнээс 107 кг-ын жинд алтан медаль хүртэж, 247 кг өргөсөн амжилтаар Дэлхийн рекордыг шинэчилсэн юм.
Ёслолын арга хэмжээний үеэр нийслэлийн ИТХ-ын дарга Р.Дагва “Энэ шагналыг олон түмэнд хүндлэгдэж, нийслэлийн иргэдийн талархлыг хүлээсэн хүнд гардуулдаг жишигтэй. Дэлхийн аварга Э.Содномпилжээгийн тухайд Монгол Улсынхаа нэрийг олон улсад гаргаж, пара паэурлифтингийн дэлхийн рекордыг шинэчилсэн гээд олон амжилт гаргасан. Тиймээс нийслэлийн ИТХ-ын Тэргүүлэгчид тогтоол гаргаж, Э.Содномпилжээг нийслэл хотын хүндэт иргэнд өргөмжилж байна. Таны цаашдын үйлсэд амжилт хүсье” гэсэн юм. Нийслэлийн Засаг дарга С.Амарсайхан “Манай улсын пауэрлифтингийн шилдэг тамирчин, дэлхийн аварга, Гавьяат тамирчин “Нийслэл хотын хүндэт иргэн” болж байгаад хотын даргын хувьд баяртай байна. Спортын салбарт оруулсан хувь нэмрээ илүү амжилтаар үргэлжлүүлж, залуусын үлгэр жишээ түүчээ болж яваарай” гэв.
Дашрамд, “Нийслэл хотын хүндэт иргэн” тэмдгээр 2014 оныг хүртэлх хугацаанд нийтдээ 18 хүнийг шагнасан байдаг. Гавьяат тамирчин Э.Содномдпилжээ нь уг тэмдгээр шагнуулсан 19 дэх иргэн болж байна. Тэрбээр “Гаргасан амжилтыг минь өндрөөр үнэлж өндөр дээд, нэр хүндтэй шагналаар шагнасанд талархаж байна. “Нийслэл хотын хүндэт иргэн” гэх нэр хүндтэй шагналынхаа нэрийг өндөрт өргөж, хотынхоо үлгэр жишээ иргэн нь байх болно” гэсэн юм.
Нийслэлийн ИТХ-ын ХМОНХТ